ភ្នំពេញ ៖ បញ្ហាឆេះផ្ទះមួយកន្លែង កាលពីវេលាម៉ោង ៥៖១០នាទី ល្ងាចថ្ងៃទី១៩ ខែមករា ឆ្នាំ២០២៤ ស្ថិតនៅត្រង់ចំណុចផ្ទះលេខ១៧ ផ្លូវបេតុង ភូមិច្រេះ សង្កាត់គោកឃ្លាង ខណ្ឌសែនសុខ រាជធានីភ្នំពេញ បណ្ដាលឲ្យស្ដ្រីម្នាក់ឈ្មោះ គ្រៀល អៀង អាយុ៨៤ឆ្នាំ បានស្លាប់បាត់បង់ជីវិតភ្លាមៗ។
យោងតាមប្រភពព័ត៌មាន
ដែលអង្គភាពសារព័ត៌មាន «អអេហ្វអិន» ទទួលបានពីសមត្ថកិច្ច បានឲ្យដឹងថា
ដោយមានការចង្អុលបង្ហាញរបស់ លោកឧត្តមសេនីយ៍ឯក ជួន ណារិន្ទ
អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោកវរសេនីយ៍ឯក ព្រហ្ម
យ៉ន បានដឹកនាំបញ្ជាផ្ទាល់ដល់កងម្លាំងពន្លត់អគ្គិភ័យដែលប្រចាំការនៅគ្រប់បណ្តាលគោលដៅទាំងអស់
ឲ្យចេញជួយអន្តរាគមន៍បាញ់ទឹកពន្លត់ឲ្យទាន់ពេលវេលា
កុំឲ្យមានការឆាបឆេះបន្តដល់ផ្ទះប្រជាពលរដ្ឋដែលនៅក្បែរនោះ។
នៅក្នុងប្រតិបត្តិការខាងលើនេះ
កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យចំនួន១១គ្រឿង
ក្នុងនោះរួមមាន៖ រថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន១១គ្រឿង
ប្រើប្រាស់ទឹកអស់១១ឡាន។
សូមជម្រាបជូនថា ចំពោះករណីគ្រោះអគ្គិភ័យខាងលើនេះ
ជាប្រភេទសំណង់ ថ្មបេតុងប្រក់សង្ក័សី ទំហំ (៥ម៉ែត្រ គុណ ១២ម៉ែត្រ)
បានបណ្តាលឲ្យឆេះអស់មួយផ្នែកខាងក្រោយ រួមមានម៉ូតូ២គ្រឿង និងសម្ភារៈអស់ទាំងស្រុង
និងពុំបានបណ្តាលឲ្យឆេះរាលដាលដល់ផ្ទះអ្នកក្បែរខាងឡើយ។
លោកវរសេនីយ៍ឯក ព្រហ្ម យ៉ន បានបញ្ជាក់ថា
ចំពោះករណីខាងលើនេះ
កម្លាំងសមត្ថកិច្ចជំនាញរបស់យើងបានធ្វើការគ្រប់គ្រង់ទាំងស្រុងនៅវេលាម៉ោង
៥និង៥៥នាទីល្ងាចថ្ងៃទីខែឆ្នាំដដែរ។ ដោយក្នុងហេតុការណ៍នេះ
ឲ្យស្ត្រីម្នាក់ស្លាប់មានឈ្មោះ គ្រៀល អៀង អាយុ ៨៥ឆ្នាំ រីឯមូលហេតុ
សមត្ថកិច្ចជំនាញបានបញ្ជាក់ជូនថា ចំពោះមូលហេតុ គឺបណ្តាលមកពីការឆ្លងចរន្តអគ្គីសនី៕